Transporti

Sipas të dhënave të DPSHTRR gjatë vitit 2024 janë regjistruar 41,140 automjete në Drejtorinë Rajonale të Tiranës nga 99,441 që janë regjistruar gjithsej, duke përbërë kështu 41.4% të totalit të automjeteve të regjistruara në Shqipëri ose 32% më shumë regjistrime për herë të parë se një vit më parë.

Burimi: Drejtoria e Përgjithshme e Shërbimeve të Transportit Rrugor

Gjatë viteve të fundit po ndërmerren hapa të rëndësishëm drejt zhvillimit të një sistemi transporti të qëndrueshëm dhe miqësor ndaj mjedisit, duke synuar të shndërrojë qytetin në një model të gjelbër dhe inovativ. Një nga prioritetet kryesore është promovimi dhe zgjerimi i përdorimit të mjeteve me emetime zero në të gjithë sektorët e transportit, duke ulur ndjeshëm ndotjen dhe përmirësuar cilësinë e jetesës për qytetarët. Ndaj, Bashkia e Tiranës ka shtuar flotën e mjeteve me autobusë elektrikë si dhe korsitë e biçikletave.

Bashkia e Tiranës ka vendosur në 3 pika të kryeqytetit tabela elektronike, të cilat numërojnë biçikletat që kalojnë. Këto pika gjenden në:

Blv “Dëshmorët e Kombit”
Rr e Kavajës
Rr “Luigj Gurakuqi”

Dy të parat kanë nisur të funksionojnë në Janar 2021 ndërsa e treta në Shtator 2021.

Sipas platfomës Eco-Visio që gjeneron të dhënat e këtyre tabelave, gjatë periudhës Janar-Dhjetor 2024 në këto 3 pika kanë kaluar gjithsej 2,180,474 biçikleta ose 5,948 biçikleta mesatarisht në ditë.

Pika më e frekuentuar është Rruga e Kavajës ku kanë kaluar 1,188,108 biçikleta ndërsa pika më pak e frekuentuar është Bulevardi “Dëshmorët e Kombit” përgjatë të cilës kanë kaluar gjithsej 148,186 biçikleta.

Aktualisht, në Tiranë operojnë 2,576 taksi, nga të cilat 1,467 janë elektrike, 63 hibride dhe 1,046 me lëndë djegëse. Mjetet elektrike përbëjnë tashmë 57% të flotës totale të taksive (nga 31.2% që përbëninin në 2023), me synimin që e gjithë flota të përbëhet nga mjete tërësisht elektrike në të ardhmen. Për të mbështetur këtë tranzicion, Bashkia ka miratuar politika lehtësuese, për të nxitur përdorimin e makinave me emetime zero. Aplikimet për shërbimin taksi që i dedikohen licencimit për herë të parë, duhet të paqesin mjete me 0 KM.

Nga ana tjetër, transporti me mjete private mbetet ende dominues në qytet, me shumë familje që përdorin makina me lëndë djegëse. Megjithatë, ka një rritje të interesit për makinat elektrike, të cilat ndihmojnë jo vetëm në reduktimin e ndotjes së ajrit dhe zhurmës, por gjithashtu kontribuojnë në krijimin e një mjedisi më të shëndetshëm dhe të qetë.